លោកឧកញ៉ាឱសថបណ្ឌិតហៃ លីអ៊ាង ថ្លែងក្នុងសន្និសីទទិវាជាតិស្តីពីវិទ្យាសាស្រ្ត
កាលបរិច្ឆេទ: ០៩ មេសា ២០២៦ / កសិកម្ម / Author : ATH Sokren
ក្នុងឱកាសទិវាជាតិវិទ្យាសាស្រ្ត បច្ចេកវិទ្យា និងនវានុវត្តន៍ឆ្នាំ២០២៦ រៀបចំឡើងដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ នៅមជ្ឈមណ្ឌលពិព័រណ៍កោះពេជ្រ លោកឧកញ៉ាឱសថបណ្ឌិតហៃ លីអ៊ាង ប្រធានអគ្គនាយកក្រុមហ៊ុន-សហគ្រាសប៉េប៉េអឹម និងខនហ្វីរេល បានរម្លឹកឡើងវិញពីតួនាទីស្នូលនៃនវានុវត្តន៍ក្នុងការពង្រីកផលិតផលកម្ពុជាទៅកាន់ទីផ្សារអន្តរជាតិ។
ថ្លែងទៅកាន់និស្សិត និងប្រធានស្ថាប័ននានា លោកបានមានប្រសាសន៍ថា ក្រុមហ៊ុនខនហ្វីរេល និងសហគ្រាសផលិតឱសថប៉េប៉េអឹមថាជា «ម៉ាស៊ីនដ៏អស្ចារ្យ» សម្រាប់ធ្វើនវានុវត្តន៍ ដែលជាផ្លែផ្កានៃកិច្ចខិតខំប្រឹងប្រែងស្រាវជ្រាវ និងអភិវឌ្ឍជាបន្តបន្ទាប់។ លោកពន្យល់យ៉ាងដូច្នេះ៖ «ជារៀងរាល់ឆ្នាំ យើងខិតខំបង្កើតផលិតផលថ្មីៗ ដើម្បីផ្សព្វផ្សាយពីភាពច្នៃប្រឌិតរបស់យើង និងដើម្បីទាក់ទាញចំណាប់អារម្មណ៍សាធារណជនលើផលិតផលរបស់យើង»។
បន្ទាប់ពីបង្កើតផលិតផល Tabastop ដែលជាថ្នាំសម្រាប់ជួយផ្តាច់បារី ផលិតឡើងនៅឆ្នាំ១៩៨៥ កាលលោកធ្វើការជាឱសថការីនៅប្រទេសបារាំង លោកឧកញ៉ាឱសថបណ្ឌិតបានបង្កើតផលិតផលច្នៃប្រឌិតជាច្រើនចាប់តាំងពីការបង្កើតសហគ្រាសផលិតឱសថប៉េប៉េអឹមកាលពីសាមសិបឆ្នាំមុន និងបន្ទាប់មកក្រុមហ៊ុនខនហ្វីរេលកាលពីឆ្នាំ២០១១។ ការច្នៃប្រឌិតទាំងអស់នោះមានដូចជា ការលើកតម្លៃស្ករត្នោតដែលទទួលបានពានរង្វាន់ la Palme d’Or ឆ្នាំ២០២៥ នៅឯពិព័រណ៍ពាណិជ្ជកម្ម NatExpo នាទីក្រុងប៉ារីស ការបង្កើតផលិតផល Kirum Herbal Tea ដែលជាតែសុខភាពផលិតពីកញ្ចុំផ្កាម្រេច ទទួលបានកម្មសិទ្ធិបញ្ញាពីប្រទេសបារាំង ការបង្កើតផលិតផលខេមប្រូប៊ីយ៉ូទិក និងនៅឆ្នាំ២០២៣ ការកែច្នៃប្រហុកខ្មែរដែលជាបេតិកភណ្ឌជាតិមានកំណើតតាំងពីនៅសតវត្សរ៍ទី៧ មុនសម័យអង្គរទៅទៀតនោះឱ្យទៅជាប្រហុកម្សៅជាលើកដំបូងដែលទទួលបានវិញ្ញាបនបត្រដូចគ្នា។
សាមសិបឆ្នាំក្រោយមក សហគ្រាសផលិតឱសថប៉េប៉េអឹមបាននាំចេញផលិតផលរបស់ខ្លួនទៅកាន់ប្រទេសជាង១៥ នៅលើពិភពលោក និងឈរជើងនៅលើទីផ្សារដែលមានអ្នកប្រើប្រាស់ជាង៤០០លាននាក់ ខណៈពេលដែលផលិតផលរបស់ក្រុមហ៊ុនខនហ្វីរេលបច្ចុប្បន្នមានវត្តមាននៅប្រទេសជប៉ុន បារាំង សហរដ្ឋអាមេរិក អូស្រ្តាលី កូរ៉េ និងនៅទីផ្សារជាច្រើនទៀត។
លោកអះអាងថា៖ «តាមរយៈការស្រាវជ្រាវ និងផលិតផលថ្មីៗរបស់យើង ដែលជាផ្លែផ្កានៃស្មារតីច្នៃប្រឌិតឥតឈប់ឈរ យើងបានបង្ហាញថា ប្រទេសកម្ពុជាពិតជាមានសមត្ថភាពក្នុងការបង្ហាញរូបភាពទំនើប និងភាពច្នៃប្រឌិតរបស់ខ្លួននៅលើទីផ្សារអន្តរជាតិ»។
លោកឧកញ៉ាឱសថបណ្ឌិតហៃ លីអ៊ាង ក៏បានសង្កត់ធ្ងន់ផងដែរថា រាល់ការច្នៃប្រឌិតទាំងអស់គឺមិនត្រឹមតែជាការបង្កើតតម្លៃបន្ថែមសម្រាប់ផលិតផលសម្រេចនោះទេ តែវាជ្រាបចូលទៅក្នុងខ្សែសង្វាក់តម្លៃទាំងមូល ពោលគឺចាប់ពីអ្នកដាំរហូតដល់អ្នកផលិត អ្នកដឹកជញ្ជូន និងអ្នកចែកចាយ។ ក្នុងករណីប្រហុកម្សៅ ការច្នៃប្រឌិតនេះបានចូលរួមចំណែកដល់ការអភិរក្សបរិស្ថានទៀតផងៈ ព្រៃលិចទឹកដែលជាតំបន់ត្រជាក់ដ៏សំខាន់សម្រាប់ជម្រកត្រី អាចផ្តល់ធនធានយ៉ាងច្រើនសន្ធឹកសន្ធាប់បានលុះត្រាតែសហគមន៍នេសាទការពារប្រព័ន្ធអេកូឡូស៊ីទាំងនេះយ៉ាងសកម្មផងដែរ។
លោកបានសម្តែងក្តីសង្ឃឹមថា ការអភិវឌ្ឍផលិតផលថ្មីៗនឹងគាំទ្រដល់កំណើនសេដ្ឋកិច្ចប្រកបដោយបរិយាបន្ន ដែលផ្តល់អត្ថប្រយោជន៍ដល់ប្រជាជនទាំងទីក្រុង និងជនបទ ចូលរួមពង្រឹងសេដ្ឋកិច្ចជាតិ និងផ្តល់ជូនពិភពលោកនូវរូបភាពថ្មីរបស់ប្រទេសកម្ពុជា។
ក្នុងសន្និសីទសារព័ត៌មានបិទបញ្ចប់នៃទិវាជាតិលើកទី៤ នេះ (ថ្ងៃទី២៦-២៨ ខែមីនា ឆ្នាំ២០២៦) ឯកឧត្តមហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានថ្លែងថា កម្ពុជាមិនមែនគ្រាន់តែជាប្រទេសប្រើប្រាស់បច្ចេកវិទ្យាទៀតទេ ប៉ុន្តែកំពុងក្លាយជាប្រទេសបង្កើតបច្ចេកវិទ្យា។ នវានុវត្តន៍ជាច្រើនដែលបង្កើតឡើងដោយយុវជនកម្ពុជាទទួលបានជោគជ័យរួចហើយក្នុងការបង្ហាញវត្តមាននៅលើទីផ្សារអន្តរជាតិ។
លោករដ្ឋមន្ត្រី បានលើកទឹកចិត្តយុវជនដែលមានទេពកោសល្យ ឱ្យងាកទៅចាប់អារម្មណ៍លើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីប្រើវាជាមូលដ្ឋានគ្រឹះនៃអាជីវកម្មនាពេលអនាគតរបស់ពួកគេ។ លោកបានគូសបញ្ជាក់ពីអត្ថប្រយោជន៍ជាក់ស្តែងនៃនវានុវត្តន៍សម្រាប់វិស័យឯកជន និងសម្រាប់ការលើកកម្ពស់គុណភាពជីវិតរបស់ប្រជាពលរដ្ឋ ដោយអំពាវនាវឱ្យមានការបង្កើតប្រព័ន្ធអេកូឡូស៊ីនវានុវត្តន៍ដ៏រឹងមាំ និងមានទំនាក់ទំនងគ្នារវាងស្ថាប័នសាធារណៈ មជ្ឈមណ្ឌលស្រាវជ្រាវ វិស័យឯកជន ក្រុមហ៊ុនដែលទើបចាប់ផ្តើមអាជីវកម្ម អ្នកវិនិយោគ និងអ្នកច្នៃប្រឌិតក្នុងមូលដ្ឋាន។
បើតាមប្រសាសន៍របស់លោក ប្រព័ន្ធអេកូឡូស៊ីនេះមានសារសំខាន់ណាស់ក្នុងការឆ្លើយតបទៅនឹងបញ្ហាសង្គម និងដើម្បីបំពេញតម្រូវការទីផ្សារ៕
